Sales

埋嚟睇埋嚟揀啦喂，唔好走寶呀！

咩嚟嫁？

呢件嘢叫救恩，好嘢嚟嫁。

點好法呀？

有咗佢包你長生不老，殺人犯都變聖人呀。

有冇咁誇呀？秦始皇同鄭和都死鬼咗啦，長生不老。。。講翻地球話呀唔該。

唔使唔該，不過其實仲可以再誇啲啲, 阿老細佢曾經起死回生，盲眼睇得見，跛腳可以周圍跑，連鬼都怕咗佢呀。佢財洪勢大，又澤深仁厚，嘔心瀝血咁發明呢件蓋世無雙嘅產品。

特異功能？

仲犀利過特異功能呀，老板佢有極高嘅知識水平，大至天文地理，小至你頭上面有幾條頭髮，佢都一清二楚呀。佢仲喺全球最大嘅供應商，連你上次食嗰碗牛腩麵，我頭先食嗰個焗海鮮飯，都喺佢供應嫁！

有冇攪錯呀？我碗牛腩麵喺我俾錢我供應嘅，關你老板咩事呀，佢又唔喺我老母又唔喺我老婆，我又冇光頭，點數我個頭有幾條頭髮呀？

佢識得你老豆老母，祖宗十八代，仲有牛腩嗰隻牛，海鮮嗰啲魚蝦蟹，都喺我老板一手一腳養大嘅，連蔬菜水果要用嘅光合作用都喺佢發明嫁。仲有你啲頭髮，你未出世之前佢已經預計到有幾多條，數過哂嫁喇。

你老闆開農場又開魚場㗎？咁咪即喺有錢又有特異功能嘅鄉下佬囉。你講到佢咁勁咁好，佢一個月俾嘅錢人工你呀？

我老細做嘢唔使錢嘅，再加上佢有用唔盡嘅資源，佢甚至可以由冇變有，你叫佢變一億出嚟，如果佢願意，即刻得，鍾意俾幾多我就俾幾多，佢俾我嘅，一定夠用，有時仲有多添。

原來你老細喺世外高人，仲識變戲法，咁都好似幾神奇喎，得閒叫佢變夠兩億俾我呀。。。你讚佢讚得咁緊要，佢喺咪俾咗好多着數你呀，睇你個樣都唔似發咗達啦，要喺街度叫賣。為咗佢，我無論發唔發，只要佢叫到，一定唔會托手踭。因為佢除咗喺我老闆，仲喺我同好多人嘅大恩人。

點恩法呀？

我以前做咗好多陰質嘢，亦都好臭寸，整到佢勁唔高興仲腰心腰肺，唔知有冇流馬尿添呀，佢嘅要求又高，又唔可以大細超，一定要嘗罰分明，如果唔喺啲靚同佢啲對頭會唔服，攪到咁大鑊，都唔知點收科，結過佢自己一條友孭哂啲罪上身，親自幫我公開頂包，喺人都知佢冇做過，但喺佢最大，佢話咩就咩，結果攪到自己俾人奚落一輪，皮開肉裂，不停流血，鑒生用嚴刑迫死，死咗之後仲要喺心口度俾人插一嘢，就喺為咗我唔使受靶，真喺諗起都心悒呀。。。

佢死咗？有冇咁慘呀？呢個世界邊有可能有人咁偉大呀，仲要瓜埋添？

你話呢？我生安白造呢啲嘢嚟做咩啫？對我又冇好處嘅。

為錢囉，駁同情等你批貨去得快啲囉。

為錢？我幾時有話過要收你錢呀？一個仙都唔使，最緊要你肯受，發自內心嗰隻。

唔使錢？有冇咁筍呀？仲有呀，我戥你老細唔抵囉，慘死之後仲要俾人將佢啲遺產周街派，佢冇仔女㗎咩？

有，有成竇仔女添，不過大部份都喺收養嘅，我未喺其中一個囉，仲有唔好意思，呢啲唔算遺產，但喺佢有好多產業，佢想同佢啲養仔養女一齊享受。

你喺咪玩嘢呀？死咗點一齊享呀？燒落去俾佢咩。

你都識得話佢喺高人啦，佢死咗之後第三日喺個墓度消失咗，冇人知佢響邊，後來發現原來佢翻生，周圍搵人傾計，仲一齊食飯添。又叫人摸佢啲傷痕，兩隻手同埋心口都有，最初有啲人都唔信喺佢，但喺又摸到又睇到又聽到，仲逗留咗四十日咁耐，真喺唔信嗰啲都要信啦。

咁勁？咁佢四十日之後去咗邊呀？

翻翻去佢鄉下囉，有好多產業嗰度呀，話去準備定啲地方俾我哋將來住喎，應承咗遲啲就會翻嚟接我哋走嫁啦。

嘩你就好啦，無啦啦多咗個咁有米又咁雷嘅世外高人老豆，發達啦！幾時帶挈吓細佬呀？

咪帶緊囉，叫你埋嚟未就喺想帶挈你囉，佢好鍾意收靚嫁，越多越好，男女老幼，高矮肥瘦都都唔驅，一樣咁照顧周到，男人老狗雖然喺肉麻啲，但喺佢真喺愛我哋嫁，佢受靶嗰單嘢唔喺靜喺為我嫁，我好多兄弟，老婆仔女都喺因為佢咁捱義氣我哋先冇事咋，為埋你同埋你啲子子孫孫嫁，如果你做咗佢條靚，有咩頭暈身慶有佢幫你撐，輕鬆好多嫁。。。仲有啲產業，將來可以同一個肯為你死嘅人一齊享福，靜喺諗都夠哂high啦。

車，佢做咩要為我死啫，我又冇殺人放火？

咁你有冇試過講大話呀？我有。你有冇諗鹹濕人哋條女或者人哋個女呀？我有囉，雖然好耐冇，不過以前日日都諗。你又有冇諗過報復或者屈人呀？我絕對有囉。
諗都唔得？
唔諗衰嘢，就唔會做衰嘢，佢啲規矩咁嚴喺有原因嘅。

咁邊有可能唔犯規呀大佬？

你都知我哋冇可能哩，所以未就喺話要靠阿老細幫拖囉。一來跟咗佢之後好自然會做少咗衰嘢，二來即使唔覺意做咗，佢都會幫我哋撐。

嘩，咁佢咪死幾萬次都唔掂？

咁又唔會喎，因為佢大粒，完全冇犯過錯，仲要受咁多苦傷得咁重; 名符其實死過翻生喎，連死亡都戰勝埋喎，簡直就喺無懈可擊啦，所以一次就攪掂，連你個孫嗰筆都勾銷埋呀，如果你個孫肯跟我老細嘅話。

咁著數，仲要唔使錢，試吓都無防喎，有冇得翻轉頭先？

絕對可以，冇人會迫你，唔鍾意隨時走都得。不過我做咗佢個仔之後high到唔想走，直頭有墮入愛河嘅感覺呀，你喺咪有啲想死呢。。。

如果唔喺見你有好嘢益我呢我已經一個右勾拳車埋你度㗎嘞，大佬，收斂吓啦，人哋唔知以為我哋喺基佬呀。咁點先可以攞個救咩恩或者做你契細佬呀？

基就基嘞，不過喺基督，耶穌基督呢就喺我老細，你亦都可以叫佢上帝，我哋信咗佢之後將來就可以上天堂，有永遠嘅生命。嗱你而家合埋眼同上帝講，細細聲就得嫁嘞，你話俾佢聽話你都同我一樣犯咗罪，你知錯嘞，求佢原諒你，你亦相信耶穌基督喺上帝個仔，佢為你釘喺十字架上死，第三日復活，你從此之後決定以主耶穌為你嘅救主同埋生命嘅主，跟從佢，聽佢枝笛。加多句，禱告交託奉主耶穌得勝名字祈求，誠心所願。

我喺唔喺真喺可以隨時走嫁？

可以，上帝俾我哋一樣嘢叫自由意志，當我哋唔願意相信嘅時候，迫都冇用，因為我哋個心已經離開咗佢，做基督嘅跟隨者，一定要口裏承認，心裏相信耶穌基督為我哋嘅救主，缺一不可。恭喜你呀阿弟兄，你已經喺阿上帝個仔啦，呢度有本聖經，同埋我嘅聯絡資料，你翻到屋企可以日日睇吓啲經文，都喺上帝嘅說話，有問題可以隨時聯絡我，我會盡量幫你。